Archive for June, 2006

bola

Sunday, June 4th, 2006

para akong bola,
bilog at makulay.
tumatalbog sa lupa
lumulutang lutang sa tubig.

para akong bola.
ipinapasa-pasa,
hinahagis,
hinahampas at
sinisipa-sipa.

para akong bola,
masaya kung titingnan,
matibay.
tatalbog talbog,
sumasabay sa takbo ng laro.

para rin akong bola,
kapag sobra sa hangin,
sasabog.
kapag kulang naman,
lulubog.

para akong bola,
nabubutas din.
at kapag na-vulcanized,
may peklat din.

para akong bola…
tatalbog talbog at
gugulong gulong.

at ikaw,
para kang bata.
hawakan mo ako ngayon,
dahil tulad ng bola,
baka bukas ako’y wala na….

Posted in Uncategorized | No Comments »